FlyArystan мамыр айында Орал – Алматы әуе рейсін іске қосуды жоспарлап отыр
Жаңа «FlyArystan» әуе тасымалдаушысы ағымдағы жылдың мамыр айында Орал – Алматы рейсін іске қосуға ниетті, деп хабарлайды ҚазТАГ агенттігінің тілшісі.
Батыс қазақстан облысы әкімінің баспасөз қызметінің хабарлауынша, мұндай келісімге аймақ басшысы Алтай Көлгінов пен «FlyArystan» әуекомпаниясының вице-президенті Паоло Ричиотти кездесуінен кейін қол жеткізілді.
«Биыл Орал әуежайының терминалын жаңғырту басталады. Оның аумағын 4 мың шаршы метрден 8 мың шаршы метрге дейін кеңейту жоспарлануда,бұл жолаушылар ағынын жылына 350 мың адамға дейін арттыруға мүмкіндік береді», — деді А. Көлгінов.
Өз кезегінде, П. Ричиотти ағымдағы жылдың мамыр айында Орал мен Алматы арасында рейс ашу жоспарланғанын, сондай-ақ Оралдан басқа қалаларға, оның ішінде Астанаға ұшу мүмкіндігі қарастырылғанын хабарлады.
«Біздің авиабилеттеріміздің құны ішкі авиатасымалдар нарығындағы қолданыстағы бағадан едәуір төмен болады»,-деп атап өтті «FlyArystan» вице-президенті.
