Қазақстанда АӘК ұсыну жүйесін өзгертеді
Еңбек және халықты әлеуметтік қорғау министрлігі атаулы әлеуметтік көмек көрсетудің қолданыстағы жүйесін өзгертетін заң жобасын әзірледі. Бұл туралы Үкімет отырысында ведомство басшысы Біржан Нұрымбетов мәлімдеді, деп хабарлайды «ҚазАқпарат»ХАА.
Біржан Нұрымбетов хабарлағандай, ағымдағы жылдың 9 айында 417 мың отбасына АӘК тағайындалды, бұл шамамен 2,1 млн адамды құрайды.
«АӘК алушылардың жартысынан астамы-көп балалы отбасы мүшелері. Енгізілген АӘК тетігі оң да, теріс да фактілерге ие. Бір жағынан, бұл жұмыс мұқтаж отбасыларға мемлекеттен нақты қолдау көрсетуге көмектесті және кейбіреулері аз қамтамасыз етілген отбасынан шыға алды. Екінші жағынан, өкінішке орай, жекелеген азаматтар АӘК мүмкіндігін кеңейтуді теріс пайдаланды. Мысалы, АӘК тағайындау кезінде 73 мыңнан астам отбасы кірісті жасырған, АӘК заңсыз тағайындаулары анықталған. Аталған жағдайлар бойынша заңнамаға сәйкес жергілікті атқарушы органдар барлық жағдайды пысықтады», — деді министр.
Осыған байланысты Біржан Нұрымбетов Министрліктің АӘК берудің қолданыстағы жүйесін өзгертетін заң жобасын әзірлегенін хабарлады.
«Басты бағыт-аз қамтылған азаматтардың табыстарын есепке алуға және ашықтық пен әділдікті қамтамасыз етудегі мемлекеттік қолдау мөлшеріне қатысты еңбекке ынталандыру. Ұсынылған шараларды кешенде қарастыру қажет. Сондықтан ұсынылып отырған жаңа ұстанымдар көп балалы аналарды қолдауды, жаңғыртылған атаулы әлеуметтік көмекті, кепілді әлеуметтік пакетті қамтиды», — деп атап өтті Еңбек министрі.
