Полиция машинасының астына түскен қыз әлі есін жиған жоқ
Лариса Бейсованың жағдайы ауыр. Ол әлі жан сақтау бөлімінде ес-түссіз жатыр.
Бұл туралы «Орал апталығы» журналистерімен байланыс орнатқан қыздың туғандары хабарлады. Олардың айтуынша Лариса әлі есін жиған жоқ.
Естеріңізге сала кетейік, 21 жасар Лариса Бейсованы 18 қараша күні кеште Оралдағы полиция патрульдік машинасын қағып кетті. ЖКО Зашаған кентіндегі «Медколледж» аялдамасы ауданында орын алған. Лариса Бейсова ЖКО орнынан ес-түссіз жағдайда ауруханаға жатқызылды. Оған ашық бас сүйек-ми жарақаты, бас миының соғылуы, бас сүйек негізінің сынуы және бұғана сынығы диагнозы қойылды. Ауруханаға жеткізгеннен кейін қызға бірден операция жасаған. Қазіргі уақытта ауруханада қыздың анасы мен ағасы бар.
Лариса Бейсова тек биыл медициналық колледжді «фельдшер» мамандығы бойынша бітіріп, мамандығы бойынша жұмыс істей бастаған.
Патрульдік автокөлікті басқарған полиция лейтенанты уақытша ұстау изоляторына қамалды. Полиция «Адам денсаулығына ауыр зиян келтіруге әкеп соққан, жол қозғалысы ережелерін бұзу » 345-бабы 2-бөлімі бойынша тергеу жұмыстарын бастады.
