Президент ЕАЭО елдерінен әкелінген автокөліктерді тіркеуге міндетті мерзімді анықтады
Қасым-Жомарт Тоқаев Үкіметке 2020 жылдың 1 ақпанына дейін ЕАЭО елдерінен ҚР азаматтары әкелген автокөліктерді уақытша тіркеуді қамтамасыз етуді тапсырды. Уақытша тіркеу 2021 жылдың 1 наурызына дейін әрекет етеді, деп хабарлайды. Today.kz.
«Үкімет бір ай мерзімде, бір реттік тәртіппен 2020 жылдың 1 ақпанындағы жағдай бойынша ЕАЭО елдерінен ҚР азаматтарының жеке пайдалануы үшін әкелінген автокөліктерді уақытша тіркеуді қамтамасыз етуі тиіс. Бұл автокөліктерге тіркелу 2021 жылдың 1 наурызына дейін әрекет етеді», – деді президент.
Тоқаев «2021 жылдың 1 наурызына дейін автокөлік иелері кедендік баж салығын және автокөлікті тұрақты есепке қою арқылы кәдеге жарату алымын төлеуге, не оны елден алып кетуге, не заңмен тыйым салынбаған өзге де әрекеттерді жүзеге асыруға тиіс», – деп нақтылады.
Бұған дейін республикалық БАҚ-та армян нөмірлері бар 2000-нан астам машина Қазақстаннан шығып кеткендігі хабарланған болатын.
