Оралда тұрғын үй кіреберісінде оқушы қызға тиіскен ер адамға қатысты «Бұзақылық» бабы бойынша қылмыстық іс қозғалды

Орал полициясы «Бұзақылық» бабы бойынша осы жылдың 13 ақпанында мектеп оқушысына шабуылдап, ізін суытқан ер адамға қатысты сотқа дейінгі тергеуді бастады.

Бұл туралы БҚО ІІД баспасөз қызметі хабарлады.

«1967 жылы туылған ер адамды полиция ұстады, оның жеке басы анықталды, «Бұзақылық» бабы бойынша сотқа дейінгі тергеу басталды, күдікті ешқайда кетпеу туралы қолхат алды», — дейді БҚО ІІД баспасөз хатшысы.

Естеріңізге сала кетейік, ағымдағы жылдың 13 ақпанында Жеңіс шағынауданындағы № 27 үйдің кіреберісінде ер адам оқушы қызға тиіскен. Балаға шабуыл жасау әрекеті бақылау камерасына түскен, қыздың айқайына көршілер шығып, құтқарып қалды.

ҚР ҚК 293-бабы «Бұзақылық» — яғни қоғамдық тәртіпті бұзу, азаматтарға күш қолданумен не оны қолданамын деп қорқытумен, сол сияқты бөтеннің мүлкін жоюмен немесе бүлдірумен, не айрықша арсыздықпен ерекшеленетін әдепсіз іс-әрекеттер жасаумен ұштасқан қоғамға анық құрметтемеушілік білдіру-екі мың айлық есептік көрсеткішке дейінгі мөлшерде айыппұл салуға не сол мөлшерде түзеу жұмыстарына не алты жүз сағатқа дейінгі мерзімге қоғамдық жұмыстарға тартуға не екі жылға дейінгі мерзімге бас бостандығын шектеу қарастырылған.

Акмарал Федорова