Оралда қалалық саябақ жабылды
Қарапайым санитарлық талаптар сақталмағандықтан саябақ 4 маусымнан бастап уақытша жабылады.
31 мамыр күні Орал қаласының әкімі Абат Шыныбеков пен қаланың бас санитарлық дәрігері Мәдениет Танауов саябақты жалға алушылармен кездесті. Сол кезде карантиндік режимді және санитарлық-гигиеналық талаптарды қатаң сақтау туралы түсініктеме берілді. Кәсіпкерлер барлық жағдайды мүлтіксіз ұстанып, келушілер мен өз клиенттерінен санитарлық ережені сақтауды талап етеміз деп сендіргенмен іс жүзінде басқалай шықты.
Қала әкімдігінен хабарлағандай, жүргізілген рейд барысында мониторингтік топ тарапынан көптеген бұзушылықтар анықталды. Қорғаныс шараларын жалға алушылардың өздері де, олардың клиенттері де орындаған жоқ. Сауда нүктелерін жүйелі түрде дезинфекциялау жүргізілген жоқ. Осы мәліметтерді фото – және бейне көрсетулермен растайды.
– Құрметті қала тұрғындары мен қонақтары қалалық мәдениет және демалыс саябағы ағымдағы жылдың 4 маусымынан бастап келушілер мен жеке кәсіпкерлердің санитарлық нормаларды сақтамауынан уақытша жабылады,-деп хабарлады БҚО әкімінің баспасөз қызметі.
Орал қаласының әкімдігінде атап өткендей, саябақта қарапайым санитарлық талаптар сақталмаған – сатушылар бетперде тақпаған, қалалықтар да бетпердесіз серуендеген, кіре берісте санитарлық нормалардың сақталуын қадағалайтын қызметкерлер болмаған.
Естеріңізге сала кетейік, Мәдениет және демалыс саябағы 15 мамырда ашылды. Ол сағат 9.00-ден 21.00-ге дейін жұмыс істеді.
