МӘМС қорына жарна төлемегендер енді тегін медициналық көмек ала алмайды
1 шілдеден бастап міндетті әлеуметтік медициналық сақтандыру жүйесі күшіне енді. Енді қорға жарна төлемегендер тегін медициналық көмек ала алмайды.
Сонда қайтпек керек?! Жұмыс істемейтін қазақстандықтар жүйенің жеңілдік берілген санатына кіреді. Бірақ ол үшін еңбекақысыз қалғандар өз мәртебесін «жұмыссыз» ретінде тіркеуі тиіс.
Сол кезде ғана медициналық қызмет ақысы мемлекет қарауына өтеді. Ал өзін-өзі жұмыспен қамтып отырғандар бірыңғай жиынтық төлем жасауы тиіс. Оның 40 проценті осы қорға аударылады.
Еңбек етіп жүргендерге сақтандыру жарнасын жұмыс беруші төлесе, 15-санатқа жататын: зейнеткер, жүкті әйелдері мен балалар бюджет есебінен сақтандырылады. Сонымен қатар, денсаулығы сыр беріп, шұғыл көмекке зәру болған азаматтарға осы қор арқылы тегін ем-дом жасалады.
Айта кетейік, осыған дейін төтенше жағдайдың енгізілуіне байланысты сақтандырылмаған азаматтардың көмек алуы 1 сәуірден 1 шілдеге дейін ұзартылған еді.
Естеріңізге сала кетейік, жақында ғана ҚР Денсаулық сақтау министрінің бұйрығымен «Әлеуметтік медициналық сақтандыру қоры» КЕАҚ жаңа басқарма төрағасы тағайындалғанын жазған болатынбыз.
