Ақсайда канализацияда жарылыс болып, бір адам қаза тапты
Бұл туралы Бөрлі ауданының әкімі Миржан Сатқановтың ресми парақшасында айтылды. Жарылыстың себебі жинақталған күкіртсутегі болды.
Жазатайым оқиға 2020 жылғы 4 тамызда сағат 09:20 шамасында Ақсай қаласының кәріз-тазарту станциясының (КТҚ) аумағында болған.
«КТҚ аумағында орналасқан механикалық торлардың ғимаратында механикалық қоспалардан тазарту жұмыстарын жүргізу кезінде жиналған күкіртсутектің жарылуы орын алды. Нәтижесінде учаске бастығы Охотный Александр Иванович қаза тауып, инженер-технолог Гончарова Елена Львовна зардап шекті. Мен Александр Ивановичтің туыстары мен жақындарына қатты қайғырып көңіл айтамын. Елена Львовнаға тезірек сауығып кетуді тілейміз», – деп жазады Миржан Сатқанов.
Әкімдік атынан Миржан Сатқанов зардап шеккендердің отбасыларына барлық қажетті қолдау мен көмек көрсетілетініне сендірді.
Бөрлі ауданы әкімінің айтуынша, қазіргі уақытта оқиға орнында тиісті органдар мен қызметтер жұмыс істейді. Оқиғаның егжей-тегжейі анықталуда.
Нана Иксанова
