БҚО – да аудандық білім бөлімінен алты миллион теңгеден астам қаржы ұрланды

Ақша елдегі төтенше жағдай кезінде ноутбук сатып алуға бөлінді.

– Ұрлық осы жылдың мамыр айында «БҚО Қаратөбе ауданының білім беру бөлімі» ММ — нің лауазымды тұлғалары мердігерлік ұйымнан бір топ адаммен сөз байласып жасалған, – деп хабарлайды ҚР Сыбайлас жемқорлыққа қарсы қызметі.

БҚО-дағы сыбайлас жемқорлыққа қарсы қызмет басшысының бірінші орынбасары Нұрдәулет Самат бұл факті бойынша тергеу басталғанын хабарлады.

– Мемлекеттік сатып алуды талдау аясында лауазымды тұлғаларға қатысты ірі көлемде қызметтік жағдайын пайдаланып ұрлау фактісі бойынша сотқа дейінгі тергеу басталды, олар 100 ноутбук сатып алуға тиесілі 6,5 миллион теңге ұрлады. Қылмыстық іс бойынша күдікті адамдардың кінәлілік дәрежесін анықтайтын түпкілікті шешімді сот шығарады, – деді Нұрдәулет Самат.

Сондай-ақ, ол 201-баптың (сотқа дейінгі тергеу деректерін жариялауға жол бермеу) негізінде тергеу мүддесі үшін басқа ақпарат жария етілмегенін айтты.