Жерлестеріміз дойбыдан әлем чемпионы атанды
Кранево (Болгария) қаласында дойбыдан өткен әлем чемпионатында батысқазақстандық қос жасөспірім Анель Дәулетова мен Тоғжан Тәжібекова өте сәтті өнер көрсетіп, әлем чемпионы атанды.
Халықаралық дойбы федерациясы (IDF) мәлім еткеніндей, 2020 жылғы интеллектуалдық спорт олимпиадасы (MSO) аясында биыл Gambler тұғырнамасында дойбы-64-тен онлайн жарыстар өткізілді.
Олимпиада аясында дойбы-64-тен төрт онлайн турнир ұйымдастырылды.
Жастар арасындағы жарысқа 174 спортшы қатысып, 11, 14 және 17 жасқа дейінгілер арасында жеңімпаз-жүлдегерлер анықталды. 17 жасқа дейінгі қыздар арасында қазақстандық Анель Дәулетова үздік шықса, Беларусь елінің өкілі Виктория Николаева екінші, ресейлік Алена Большакова үшінші орынға ие болды.
Әлемнің 19 елінен 200-ге жуық спортшы қатысқан дүниежүзілік додада Анель 16 жасқа дейін, Тоғжан 13 жасқа дейін дойбыдан әлем чемпионы атанса, алты дүркін әлем чемпионы Алтынай Жұмакелдиева әйелдер арасында тұңғыш халықаралық гроссмейстер атағын иеленген қазақстандық атанды.
Оған қоса ұлдар мен қыздар арасында жалпы есепте БҚО-ның дойбыдан аға бапкері, Қазақстанның еңбек сіңірген жаттықтырушысы Данияр Жұмагелдиевтің шәкірттері екінші орынға көтерілді.
– Анель Дәулетова №19 орта мектептің 10-сыныбында оқиды. Ол дойбыдан екі дүркін әлем чемпионы, бірнеше дүркін Қазақстан, Азия чемпионы, IDF шебері. Онымен жеті жылдан бері жұмыс жасап келемін. Тоғжан Тәжібекова қаламыздағы №42 «Ақ ниет» гимназиясының 7-сынып оқушысы. Ол да бірнеше дүркін Қазақстан чемпионы, екі дүркін Азия, екі дүркін әлем чемпионы атанды. Тоғжанды бес жылдан бері жаттықтырып келемін. Мен жас дойбышыларымның болашағынан үлкен үміт күтемін, – дейді бапкер.
Бұл Анельдің бірінші табысы емес. Ол бұған дейін екі дүркін әлем чемпионы атанған болатын.
