21 тамызда Қазақстанда барлық оқушылар үшін сынып сағаты өтеді

Оған балалар ата-аналарымен қатыса алады. Сынып сағатының тақырыбы: «Мен жаңа оқу жылында қалай оқимын?».

21 тамызда еліміздің барлық оқушылары үшін жалпыреспубликалық бірыңғай сынып сағаты өтеді. Бұл туралы Білім және ғылым министрлігінің баспасөз қызметі хабарлады.

«Жаңа 2020-2021 оқу жылында карантиндік шаралар жағдайында білім алушыларды оқыту форматтарымен таныстыру мақсатында 21 тамызда «Мен жаңа оқу жылында қалай оқимын?» тақырыбында еліміздің барлық оқушылары үшін жалпыреспубликалық бірыңғай сынып сағаты өтеді. Сынып сағаты қашықтан болады, ал уақытын мектеп әкімшілігі бекітеді. Қалауы бойынша ата-аналар балаларымен бірге қатыса алады», — делінген хатта.

Сынып сағаты барысында сынып жетекшілері келесі мәселелерді түсіндірмек:

• Карантиндік шаралар кезіндегі оқыту форматтары;

• Қашықтан білім алу барысында пайдаланылатын интернет-платформаның мүмкіндіктерімен танысу;

• Мен және менің денсаулығым (гигиена негіздері, физикалық белсенділік);

• Жаңа оқу жылында білім алушыларды бағалау жүйесі;

• Интернетте жұмыс істеу ережелері, ақпараттық қауіпсіздік.