БҚО тұрғыны 172 ақбөкен мүйізін қораға көміп тастаған

Жаңақала ауданының тұрғыны 172 киік мүйізін шаруашылық құрылысында көмген, деп хабарлайды Polisia.kz.

Жаңақала ауданының ПБ криминалдық полиция қызметкерлері БҚО Жаңақала ауданында тұратын 33 жастағы ауыл тұрғынынан ақбөкен мүйіздерін тәркіледі. 172 дана киіктің мүйіздері ұсталған адамға тиесілі үйдің шаруашылық құрылысында көмілген.

Жаңақала аудандық ПБ-нің аталған дерегі бойынша сотқа дейінгі тергеу амалдары жүргізілуде. ҚР ҚК 339 Б.1-1-Б. «Сирек кездесетін және құрып кету қаупі төнген жануарларды, олардың бөліктерін немесе дериваттарын заңсыз қолдану».

Департамент бастығы Махсудхан Аблазимовтың тапсырмасы бойынша адамды заңсыз аң аулауға қатыстылығын анықтау үшін жедел-тергеу тобы құрылды.

Ағымдағы жылдың басынан бері БҚО полиция департаментінің қызметкерлері сирек кездесетін және құрып кету қаупі төнген жануарлармен, олардың бөліктерімен немесе дериваттарымен заңсыз аң аулау және заңсыз жұмыс істеуге байланысты 29 қылмысты анықтады.