Қазақстанда 3 қазаннан бастап ескі банкноттар айырбасталмайды
2020 жылдың 3 қазанында 2006 жылғы үлгідегі номиналы 2 000, 5 000 және 10 000 теңгелік банкноттарды айырбастау кезеңі аяқталады, деп хабарлайды Ұлттық банктің баспасөз қызметі.
Әзірге қолма-қол ақша айналымынан алынған банкноттарды Ұлттық валютаның қолданыстағы ақша белгілеріне айырбастау тек Ұлттық банктің филиалдарында ғана жүргізіледі.
«2006 жылғы үлгідегі банкноттарды кезең-кезеңмен ауыстыру және алып қою 2016 жылдың қараша айында басталды. Ағымдағы жылдың 3 қазанында осы банкноттардың айналыс мерзімі аяқталғаннан кейін Ұлттық банктің филиалдары оларды қабылдауды және қолданыстағы ақша белгілеріне айырбастауды тоқтатады. Осы күнге дейін банкноттарды еліміздің 17 қаласында орналасқан ҚР ҰБ барлық аумақтық филиалдарында айырбастауға болады», – деп түсіндірді Ұлттық Банктің қолма-қол ақша айналымы департаментінің директоры Жомарт Қажмұратов.
