БҚО-да мектеп дәретханаларын жайластыруға 310 млн теңге бөлінді
Бұл қаржыға 139 мектепте ішкі дәретханалар жабдықталған. Сонымен қатар жол-көлік оқиғаларының алдын алу үшін 20 қалалық мектепте бағдаршамдар мен жаяу жүргіншілер өткелдері орнатылған.
Облыс әкімдігінде облыс әкімі Ғали Есқалиев пен педагогикалық сала қызметкерлерінің қатысуымен дәстүрлі тамыз конференциясы өтті. Аймақ басшысының айтуынша, облыс мектептерінде ішкі дәретханаларды жайластыру және бейнебақылау камераларын орнату бойынша белсенді жұмыстар жүргізілуде.
— 139 мектепте 310 млн теңгеге ішкі дәретханалар орнатылды. Тағы 206 млн теңгеге бейнебақылау камералары орнатылды. Мұның бәрі біздің балаларымыздың қауіпсіздігі үшін жасалады. Мұндай жұмыс болашақта да жалғасатын болады, — деп атап өтті Ғали Есқалиев.
Облыс әкімі балалардың қауіпсіздігін қамтамасыз етудегі тағы бір негізгі міндет-жолдардағы қауіпсіздікті атады.
– Өткен жылы болған қайғылы оқиға біздің ортақ қайғымызға айналды. Мұндай жағдайлар болмас үшін мен қалалық әкімдікке арнайы комиссия құрып, қала жолдарындағы ең қауіпті учаскелерді анықтауды тапсырдым. Бүгінгі күні үлкен және магистралды көшелерде төрт мыңға жуық көше жарықтандыру тіректері орнатылды, аса қауіпті қиылыстарда сегіз бағдаршам орнатылды. Жыл соңына дейін тағы 15 мыңға жуық көше жарықтандыру тіректерін ауыстыруды жоспарлап отырмыз. 1 қыркүйекке дейін 62 жаяу жүргіншілер өткелін жайластыру жұмыстары аяқталады, — деді Ғали Есқалиев.
Айта кету керек, жол-көлік оқиғаларының алдын алу үшін 20 қалалық мектепте бағдаршамдар мен жаяу жүргіншілер өткелдері орнатылған. Мұндай жұмыс ауылдық елді мекендерде де жүргізілуде.
