БҚО-да 1 қыркүйек қалай өтеді

БҚО білім басқармасының басшысы Айгүл Мыңбаева облыс бойынша жаңа оқу жылына дайындық аяқталғанын, оқыту форматы анықталғанын айтты.

Облыстың бас педагогы штаттық режимде оқыту қатаң санитарлық нормаларды сақтай отырып өтетінін атап өтті. Бұл режимде 20 мыңнан астам оқушы, қашықтан режимде 91 мыңнан астам оқушы білім алатын болады.

– Дистациялық оқыту сыныптарында сабақтарда 15 оқушы болады. Облыс бойынша 2 539 кезекші сынып ашу жоспарланған. Мектептерде ауысымдарды көбейту және әлеуметтік дистанциялауға арналған кіші ауысым ұйымдастырылады, кабинеттік жүйе алынып тасталды, сабақтар арасындағы үзілістерді ұйымдастыру әр түрлі сыныптар үшін әр уақытта болады, оқушылар кіре берісте күн сайын температураны өлшейді, сондай – ақ әр ауысымнан кейін ылғалды жинау ұйымдастырылады, – деп түсіндірді Айгүл Мыңбаева.

Сонымен қатар, облыста оқытудың форматына қарамастан, қосымша білім беру ресурсы ретінде «Ел-Арна», «Балапан»республикалық арналарында телевизиялық сабақтар пайдаланылатын болады.

Жұмысты қашықтықтан ұйымдастыратын облыстың барлық мектептері Bilimland білім беру платформаларына қосылған.

– 25 тамыздан бастап осы платформада сынақ сабақтары жүргізілуде. Облыс мектептері оқушыларға қажетті оқулықтармен толық қамтамасыз етілген, – деп түсіндірді облыстың бас педагогы.

Айгүл Мыңбаева Білім күніне орай 1 қыркүйек линейка қалай өтетінін айтты.

– Әр сыныпта сынып сағаттары болады. Егер балалар күндізгі бөлімде оқитын болса, мұғалім балаларымен сынып сағатын өткізеді. Ал егер балалар қашықтықтан оқитын болса, онда 1 қыркүйекте сынып сағатын өткізу үшін мектепке келудің арнайы қажеттілігі жоқ. Олар үшін барлығы қашықтықтан ұйымдастырылады, – деп атап өтті БҚО білім басқармасының басшысы.