Оралда көпқабатты үйдің балалары қоқыстың қасында ойнауға мәжбүр
Орал қаласындағы Құрманғазы көшесі 175 үйдің балалар ойын алаңы қоқыс төгетін жердің тап қасындар орналасқан.
Үй тұрғындарының бармаған жерлері, қақпаған есіктері жоқ, нәтижесі сол баяғы жартас, бір жартас күйінде. Жергілікті атқа мінерлер мен Облыстық СЭС көңіл аудара деген ниетпен үй тұрғындары бейне түсіріп, оны әлеуметті желіге салды.
Тұрғындардың айтуынша, кішкене жел тұрса болды бүкіл қоқыс қалдықтары ұшып ойын алаңына келеді. Ең болмағанда, (Ойын алаңы деп айтуға келсе) осы екі ортаны қоршап берсе екен деп, өтініш білдіреді амалы таусылған үй тұрғындары.
Жартылай жабылған құдық, сасыған иістің қасында еліміздің болашағын жасайтын бүлдіршіндер ойнап жүр. Бәрінің бірдей ата-аналары балаларын көздің қарашығындай қарап, қастарында еріп жүре алмайды. Ал өздерін ойынға жіберу қауіпті. Бұралқы иттер мен қаңғыбас адамдар қоқыс жәшігінің қасында көп жүреді. Балалардың осы жағдайын көрер көз, естір құлақ болса ғой, шіркін.
