Оралда Әлия Молдағұлова көшесі жабылады
Бұл туралы тұрғын үй-коммуналдық шаруашылық, жолаушылар көлігі және автомобиль жолдары бөлімінде хабарлады.
— 2020 жылғы 2 қыркүйек сағат 20-дан 7 қыркүйекке дейін жолдарды жөндеуге байланысты Молдағұлова көшесі бойынша Петровский көшесінен Исаев көшесіне дейін қозғалыс шектеледі. Қалалық маршруттардың қозғалысы Петровский, Мәметова, Исаев, Молдағұлова көшелері бойынша және одан әрі өз сызбасы бойынша жүзеге асырылады. Келтірілген қолайсыздықтар үшін кешірім сұраймыз-делінген хабарламада.
Айта кетейік, биыл жолдарды жөндеу сапасын тексеру барысында көптеген бұзушылықтар анықталған еді. Әлия Молдағұлова көшесін жөндеу тарихы 2019 жылдың жазында басталды. Маусым айында автокөлік қозғалысы үшін жол жабылды. Жұмыстарды «Бірлік»ЖШС мердігерлік ұйымы жүргізді. Жөндеу құны шамамен 700 млн теңгені құрады. Бірақ комиссия жолды пайдалануға қабылдамады. Құрылыс сапасыздығы анықталды. Мамандар ақаулардың себептері сапасыз құрылыс материалдары мен асфальт төсеу схемасының дұрыс еместігі болуы мүмкін екенін айтты. Енді жаңадан шарт жасасқан мердігер ұйым «ДСК Приоритет» ЖШС сапасыз жиектерді ауыстырып, 6700 шаршы метр алаңға асфальт төсейді.
Биыл Орал қаласында 50 шақырым жол жөндеуден өтуде. Олардың барлығы қазан айына дейін пайдаланылуға берілуі тиіс.
