Оралда 7-қабаттың терезесіне шығып алған бала бейнеге түсіп қалды
Оралда 7-қабаттың терезесіне шығып алған бала бейне жазбасы әлеуметтік желіге тарады. Анасының айтуынша, кәмелетке толмаған бала терезені сүртпек болған. Ата-анасына ескерту жасалды.
Instagram желісіндегі zhaloby_uralsk_official парақшасында Мөңкеұлы көшесінде баланың 7-қабаттың терезесіне шығып алғаны туралы жазба пайда болды.
«Бұл 7 қабат. Бала терезені ашып, сыртқа шығып тұр. Мүмкін, ата-анасы үйге жалғыз өзін тастап кеткен болар», – дейді жариялым авторы.
Қысқа уақыт ішінде пост үш жүзден астам пікірлер жинады. Оралдықтар жақында төрт жасар баланың төртінші қабаттың терезесінен құлап, қайтыс болғанын атап өтті.
«Мүмкін ата-анасының тағы басқа балалары бар шығар? Әлде, олар пластикалық терезелер тек қана 4 болтқа бекітілгенін білмей ме екен», – деп облыс орталығының тұрғындарының бірі сұрақ қоя таңданады.
«Бүгін сол ауданда болды. Мен бес жасар ұл мен үш жасар қызды көрдім. Олар терезе жақтауында отырды. Терезеде қорғаныс торы жоқ. Мен оларға ұрыстым, содан кейін олар кетіп қалды», – дейді басқа әйел.
БҚО полиция департаментінің өкілдері баланың ата-анасымен профилактикалық әңгіме жүргізілгенін айтады.
«Бала ата-анасымен бірге осы үйдің 7-қабатында тұрады. Анасының айтуынша, кәмелетке толмаған бала терезені сүртпек болған. Ата-анасына ескерту жасалды, – деді полициядағылар.
