БҚО тұрғындарына жылыту маусымында қауіпсіздік ережелері түсіндірілуде
Төтенше жағдайлар департаменті жылыту жүйелері мен электр жабдықтарын пайдалану ережелері туралы халықпен ақпараттық-профилактикалық жұмыс жүргізуде.
Батыс Қазақстан облысы бойынша Төтенше жағдайлар департаментінде атап өткендей, жыл сайын өрттің жалпы санының шамамен 60%-ы ақаулы пештер мен жылытқыштардың салдарынан тұрғын үй секторында болады.
«2020 жылдың 8 айында Батыс Қазақстан облысының аумағында 419 өрт болды, оның 246-сы тұрғын үй секторында, 16-сы көпқабатты жайлы үйлерде тіркелді. Тұрғын үй секторындағы өртте 3 адам қаза тапты, 7 адам түрлі дәрежедегі жарақат алды», – деді БҚО ТЖД аға инженері Рафаэль Бекчентаев.
Құтқарушылардың негізгі күш-жігері халықтың әлеуметтік осал топтарымен профилактикалық жұмысқа бағытталған. Осы бағыттағы жұмыстар ағымдағы жылдың тамыз айынан басталып, қазан айында жылыту маусымы басталғанға дейін жалғасады. Қолайсыз отбасыларға ерекше көңіл бөлінеді. Көбінесе бұл отбасыларда ересектер алкогольді асыра пайдаланады, ал балалар өздеріне қалады. Мұндай әлеуметтік жағдайы төмен отбасыларда өрт қаупі едәуір артады дейді мамандар.
Рейдтер және тұрғындармен әңгімелесу барысында инспекторлық құрам жылыту пештерін, электр сымдары мен газ жабдықтарының жағдайын тексереді, тұрғындармен профилактикалық консультациялар жүргізеді, оларға жылыту маусымында қауіпсіздік шараларын сақтау бойынша жадынамалар табыстайды.
