Премьер-министр Асқар Мамин әкімдерге тапсырма беріп, азық-түлік бағасының қатаң бақылануы туралы ескертті
Ішкі өндіріспен қамтамасыз етілген өнімдер, әсіресе картоп, ұн, сәбіз және қарақұмық жармасының бағасын өсірмесін.
«Барлық әкімдіктер осы бағытта белсенді жұмысты жалғастырып, бағаны тұрақтандыру бойынша шаралар қабылдасын. Тәжірибе көрсеткендей, тиімді құралдар бар. Әкімдіктердің уақтылы алдын алу шараларын қабылдауы бағаларды тұрақтандыруды және ұстап тұруды қамтамасыз етуге мүмкіндік береді. Біз импортқа тәуелділікті азайту үшін мақсатты түрде жұмыс істейміз. Бағаның өсуіне ешқандай себеп жоқ. Әлеуметтік маңызы бар тауарлардың барлық түрлері бойынша бағаның тұрақтылығына қатаң бақылау қамтамасыз етіледі»,-деді Асқар Мамин Үкімет отырысында.
Ол ауыл шаруашылығы министрі мен өңірлердің әкімдеріне бірнеше тапсырма берді.
«Халықаралық астық нарықтарындағы қалыптасып отырған конъюнктураны ескере отырып, ауыл шаруашылығы министрлігі әкімдіктермен бірлесіп, сыртқы ахуал мен азық-түлік қорларының жеткіліктілігі мен әлеуметтік маңызы бар тауарлар бағасының тұрақтылығына мониторингті жалғастырған жөн.Ауыл шаруашылығы министрлігіне барлық өңірлерде сауда желілеріне жеңілдетілген займдар тетіктерін «айналым схемасы» арқылы енгізуді, сондай-ақ әлеуметтік маңызы бар тауарлар бағасының тұрақтылығын қамтамасыз ету үшін форвардтық сатып алу практикасын енгізуді тапсырамын. Азық-түлік қауіпсіздігін қамтамасыз ету үшін әкімдіктерге импортқа тәуелді тауарлар (қант, жеміс-көкөніс өнімдері және басқалары) өндірісін ұлғайту жөніндегі жобаларды басым тәртіппен іске асыруды қамтамасыз етуді тапсырамын. Сондай — ақ, ауыл шаруашылығы министрлігі мен өңірлер әкімдерінің назарын ішкі өндіріспен қамтамасыз етілген өнімдерге, әсіресе картоп, ұн, сәбіз және қарақұмық жармасына бағаның өсуіне жол бермеуге аударамын», — деді Мамин.
