Оралда көпқабатты үй өртеніп, бір адам зардап шекті
Оралда бес қабатты тұрғын үйде өрт шығып, 30 адам эвакуацияланды. Бұл туралы БҚО ТЖ департаментінің баспасөз қызметі хабарлады.
Оқиға 19 қыркүйек күні сағат 19.17-де Дәулеткерей көшесі 31-үйде орын алды. Осы үйдің бесінші қабатындағы 12-пәтерде жеке заттар жанды. Өрт аумағы 25 шаршы метрді қамтыды. «Тілсіз жау» сағат 19.36-да оқшауланып, 19.50-де ауыздықталды. Оқиға орнынан 30 адам шығарылса, соның бесеуі – балалар — делінген хабарламада.
Зардап шеккен бір адам жедел жәрдем бригадасына тапсырылды. Қазіргі кезде өрттің шығу себебі, келтірілген шығын, кінәлі адамдар анықталу үстінде.
Облыстық денсаулық сақтау басқармасы баспасөз қызметінің қосымша нақтылауынша, 47 жастағы ер адам оң жамбасы мен білегінен күйік жарақатын алған. Ол мас күйінде болған. 43 жастағы ер адам жеңіл дәрежеде газдан уланған. Екеуі де қалалық көпбейінді аурухананың хирургиялық бөлімшесіне жатқызылды.
