БҚО-да 86 жастағы зейнеткер әжені тонап кетті

29 қыркүйек күні, Байтерек ауданы Щапов ауылында белгісіз екі адам зейнеткердің 300 000 теңге ақшасын ұрлап кеткен. Аталған дерек бойынша қазіргі таңда қылмыстық іс қозғалды.

Бұл туралы Бәйтерек ауданының полиция бөлімі басшысы Сұлтан Шалдарбеков айтты.

— 29 қыркүйек күні, шамамен сағат 22:00-де белгісіз екі тұлға Байтерек ауданына қарасты Щапов ауылы Жайық көшесі – 21 үйдің есігін сындырып кіріп, 1934 жылы туған А есімді тұрғынға күш қолданған. Қол-аяғын байлап, сол кісіге тиесілі 300 000 теңге ақшасын жымқырып оқиға орнынан бой тасалаған, — дейді ол.

Қазіргі таңда бұл оқиға бойынша ҚР қылмыстық кодексінің 192-бабы, 2-бөліміне сәйкес іс қозғалған. Қылмысты ашу мақсатында жедел тергеу тобы құрылған. Жедел тергеу тобының құрамында БҚО ПД криминалды полиция қызметкері және Бәйтерек ауданы полиция бөлімінің қызметкерлері бар. Қылмыстың ізін суытпай ашу үшін жедел іздестіру шаралары жүріп жатыр.

Серік ЕСЕНОВ