БҚО-да сенбі күні сауда үйлері жұмыс істемейді
Коронавирустық инфекцияны жұқтыру қаупіне байланысты сауда орталықтарының жұмыс кестесі өзгеріссіз қалады. Бұл туралы облыстық тауарлар мен қызметтердің сапасы мен қауіпсіздігін бақылау департаменті хабарлады.
— Соңғы екі аптада коронавирустық инфекция ауруының өсуі байқалатындықтан, демалыс күні сауда үйлерінің жұмысына рұқсат беру облыс тұрғындарын вирус жұқтыруға ұшыратуы мүмкін, — деп хабарлады департаменттен.
Сондай-ақ, ведомствода сауда үйлерінде орналасқан дәріханалар мен азық-түлік бөлімдері бұрынғы режимде жұмыс істейтіндігін атап өтті.
Айта кетейік, ҚР Премьер-министрі Асқар Маминнің төрағалығымен өткен ведомствоаралық комиссия отырысында сенбі күні кешкі сағат беске дейін сауда үйлерінің жұмыс істеуіне рұқсат беру туралы шешім қабылданды. Бірақ демалыс күні облыстар бойынша жұмыс істеуге рұқсатты жергілікті бас санитарлық дәрігерлер бақылайды және эпидемиологиялық жағдайдың тұрақтылығына және сырқаттанушылықтың өсуіне байланысты шешім қабылдайды.
