Әлем алдағы бірнеше айда пандемияның өте қиын кезеңін бастан өткереді
Дүниежүзілік денсаулық сақтау ұйымының басшысы Тедрос Адханом Гебрейесус коронавирустың таралуына байланысты әлемде қиын жағдай туындағанын хабарлады.

«Әлем, әсіресе Солтүстік жарты шар бұл пандемияның күрделі кезеңінде тұр. Алдағы бірнеше ай өте қиын болады және кейбір елдер қауіпті жолға түседі. Көптеген елде сырқаттанған адамдар саны күрт өсіп жатыр», – деп мәлімдеді ДДҰ басшысы брифинг барысында.
Ол мемлекет басшыларын өлім-жітім өсіп, денсаулық сақтаудың негізгі қызметінде дағдарыс болып, мектептер қайта жабылмау үшін шұғыл шаралар қабылдауға шақырды, деп хабарлады РИА Новости.
Ал ДДҰ бас ғылыми қызметкері Сумия Сваминатан қарашаның соңына қарай бір немесе екі Covid-19 вакцинасы сынақтың үшінші кезеңінен өткізілетінін мәлімдеді. Айтуынша, сол кезде препаратты төтенше жағдайлар кезінде қолдануға кеңес беруге болады.
23 қазанда Covid-19 індетінің әлемдегі күн сайынғы өсімі бойынша жаңа рекорд тіркелді – 445 419 адам ауырған. Жалпы, пандемия басталғаннан бері 41 570 883 адам коронавирус жұқтырғаны анықталып, оның 1 134 940-ы қайтыс болды.
Қазақстанда өткен тәулікте коронавирус инфекциясын жұқтырған 164 адам тіркелді.
Республика бойынша ең көп науқас тіркелген өңірлер:
ШҚО – 25;
Нұр-Сұлтан – 22;
Алматы – 20.
Республика бойынша барлығы 110 250 адам коронавирус инфекциясын жұқтырса, емделіп жазылғандары – 105 566.
Денсаулық сақтау министрлігінің мәліметінше, Covid-19 жұқтырып, қайтыс болғандар саны 1 811-ге жетті.
1 тамыздан бері коронавирустық пневмониямен 36 732 адам ауырып, 393 науқас көз жұмған (23 қазанда тіркелген науқас саны – 165, көз жұмғандар – 2).

«Қазіргі уақытта коронавирустық инфекциядан 2 869 адам ем қабылдауды жалғастыруда. Олардың арасында 211 өскіншек бала бар. Стационарларда 2 317 науқас жатыр. 552 адам амбулаториялық жағдайда емделуде.
Жалпы науқастардың арасында 124 адамның ахуалы нашар. Соның ішінде 10 науқастың ахуалы аса қатты ауыр деп бағалануда. 16 науқас өкпені жасанды желдету аппаратында жатыр» делінген Денсаулық сақтау министрлігі таратқан ақпаратта.