БҚО-да адам өліміне соқтырған бірнеше жол апаты болды

БҚО полиция департаментінің баспасөз қызметі мәлім еткеніндей, соның екеуі Орал-Атырау жолының бойында орын алды.

Бәйтерек ауданы аумағында 14 желтоқсан күні сағат 18.30-да Орал-Атырау жолының 29-шақырымында 53 жастағы жүргізуші «Нива» автокөлігімен келе жатып, «КамАЗ» автокөлігінің жанында тұрған 40 жастағы жүргізушіні қағып кетті. Соның салдарынан ол жедел жәрдем көлігінде көз жұмды.

Сондай-ақ 18 желтоқсан күні шамамен сағат 18.35-те аталған жолда 39 жастағы жүргізуші «ВАЗ» автокөлігімен басып озамын деп, қарсы келе жатқан «Аудимен» соқтығысуға жол берді. Салдарынан «ВАЗ» автокөлігінің жолаушылары Ақжайық аудандық орталық ауруханасына жеткізілді. 43 жастағы әйел түрлі жарақат алса, 57 жастағы әйел ауруханада қайтыс болды.

Тағы бір оқиға Орал қаласында болды. 16 желтоқсан күні шамамен сағат 18.30-да 42 жастағы жүргізуші «Toyota Corolla» автокөлігімен Н.Назарбаев даңғылымен келе жатып, 20 жастағы жаяу жүргіншіні қағып кетті. Жігіт облыстық көпбейінді ауруханаға жеткізілгенімен, 9 сағаттан кейін жансақтау бөлімінде жан тапсырды.

Марқұмдардың денелері сот-медициналық сараптамаға жіберіліп, автокөліктер арнайы тұраққа қойылды.

Қазіргі кезде үш оқиға бойынша ҚР ҚК 345-бабы 3-бөлігіне сәйкес тергеу амалдары жүргізілуде.