БҚО-да қаңғыбас иттер тұрғандардың малдарына шабуыл жасауда (БЕЙНЕ)
БҚО Жаңақала ауданында қаңғыбас иттер тұрғындардың төрт түлігін талап жеуде. Иттердің малдарға шауып жатқан видеолары әлеуметтік желіде тарап жатыр.
Жаңақала тұрғыны Айболат Бөкенов осы жылдың тамыз айында нағашысының екі ешкісі мен бір қойын жеп кеткенін айтады.
— Бұл жағдай тамыз айында болды. Мен оны өз көзіммен көргем. Енді 25-ші желтоқсан да тағы осындай жағдай орын алды. Ауыл адамдары Жаңақала деген уатцап группаға жіберді. Ауылда қаңғыбас иттер толып жүр. Ветеринарлар «иттерді атуға рұқсат беретін заң жоқ» дейді. Ауыл тұрғындары балаларын сабаққа жалғыз жіберуге қорқады. Тамыз айында болған жағдайдан соң әкімшілік: «бұл мәселені шешетін қауқарымыз жоқ» деді. Ауданда иттерді қамайтын арнайы орында, био-залалсыздандыру жасайтын мамандар да, құралдар да жоқ, — дейді Айболат Бөкенов.
Жаңақала ауданы ветеринарлық бөлімі басшысы Мұрат Досмұхамедов осы жылы 200-ге жуық ит атылғанын айтып отыр.
— Қараша айында Жәңгір хан атындағы БҚАТУ жанындағы ветеринарлық клиникамен келісім-шарт жасасқанбыз. Малға шапқан жағдайдан кейін біз иттерді аулап (ұстап) университетке апардық. Олар 50 итті био-зарарсыздандырудан өткізіп, оларды қайтадан ауылға әкелді. Сонда да қаңғыбас иттердің саны азаймай тұр. Енді қазіргі таңда арыз-шағым бойынша иттерді атып жатырмыз. Малға шапқаны ештеңе емес, адамға шабуы мүмкін, — дейді Мұрат Досмұхамедов.
Серік Есенов
