Оралда 23 жастағы тұрғын пышақ жарақатынан көз жұмды

Оқиға 6 ақпан күні түнде орын алған. Жаппай төбелестің салдарынан 23 жастағы жігіт бірнеше жерінен пышақ жарақатын алып, сол жерде қаза болған.

БҚО денсаулық сақтау басқармасының баспасөз қызметі «жедел жәрдем» түнгі сағат 00.17-де шақырылғанын айтады.

— Бір адам «жедел жәрдем» келгенге дейін мерт болды. 30 және 23 жастағы жігіттер пышақ жарақатынан зардап шекті. 20 жастағы тағы бір жігіт екі көзінен химиялық күйік жарақатын алған,-дейді.

БҚО полиция департаментінің ресми өкілі Болатбек Белгібеков жедел іздестірудің нәтижесінде 27 жастағы Орал қаласының тұрғыны ұсталғанын айтты.

– Күдіктінің іс-әрекетінен тағы екі жас жігіт зардап шегіп, облыстық көпбейінді ауруханаға жатқызылды. Ол осыған дейін қоғамдық орында арақ ішкені үшін әкімшілік жауапкершілікке тартылған. Қазіргі таңда ҚР Қылмыстық Кодексінің 99-бабы, 1-бөлігіне (адам өлтіру) сәйкес, сотқа дейінгі тергеу амалдары жүргізуде,– дейді ол.

Есенжол Елекенов