Шетелдік азамат ауыр жүк көлігімен БҚО тұрғынын қағып, апат болған жерден қашып кеткен
Полицейлер жол-көлік оқиғасына кінәлі адамды «ізін суытпай» ұстап, уақытша ұстау изоляторына жіберді.
БҚО полиция департаменті баспасөз қызметінің мәліметінше, апат 9 ақпанда сағат 20.45-те Бәйтерек ауданы Мичурино кентінің жанындағы Самара-Шымкент тас жолында болған. Қырғызстан азаматы DAF автокөлігін жүргізіп келе жатып, жолдан өтіп бара жатқан 33 жастағы жаяу жүргіншіні қағып кеткен.
– Алған жарақаттардан зардап шеккен адам оқиға орнында көз жұмды, ал ауыр жүк көлігінің жүргізушісі оқиға орнынан ізін суытқан. Мәйіт мәйітханаға сот-медициналық сараптамаға жіберілді. Жүргізуші ұсталып, уақытша ұстау изоляторына қамалды. Оған қатысты ҚР ҚК – нің 345-бабы «Көлік құралдарын басқаратын адамдардың жол қозғалысы немесе көлік құралдарын пайдалану қағидаларын бұзуы» және ҚР ҚК-нің 347-бабы «ЖКО орнын қалдыру» бойынша сотқа дейінгі тергеу басталды», – деп хабарлады полициядан.
Жаяу жүргіншіні тағы қағып кету оқиғасы сол күні сағат 18.50-де Т.Масин мен Даумов көшелерінің қиылысында болды. 28 жастағы жүргізуші жүргізуші куәлігінсіз рульге отырып, қиылыста жолдан өтіп бара жатқан 30 жастағы әйелді қағып кетті. Жәбірленуші түрлі жарақатпен ауруханаға жеткізілді.
– Аталған факті бойынша ҚР ҚК 345 – бабы «Көлік құралдарын басқаратын адамдардың жол қозғалысы немесе көлік құралдарын пайдалану ережелерін бұзуы» бойынша сотқа дейінгі тергеу басталды», – деп қорытындылады полицейлер.
