БҚО-да екі мыңнан аса тұрғын жарықсыз отыр
БҚО-да ауа райы күрт өзгеріп, күн сутты. Ақтүтек боран салдарынан бірқатар елдімекендегі электр бағаналарының сымдары үзіліп, тұрғындар жарықсыз қалды.
Бұл ақпаратты БҚО төтенше жағдайлар департаментінің бас маманы Нұралы Мусиев журналистерге берген сұхбатында айтты.
– Ауа райының қолайсыздығына байланысты қазіргі таңда алты республикалық, үш облыстық автожол жабылды. Өткен тәулікте жолда қалып қойған 15 техника қар құрсауынан шығарылып, 63 адам құтқарылды. Соның жетеуі бала. Құтқарылған адамдарға тиісті көмек көрсетілді. Зардап шеккендер жоқ. Сондай-ақ облыс бойынша елдімекеннің екі мыңнан аса тұрғыны жарықсыз қалып отыр. Қазір қалпына келтіру жұмыстары жүргізілуде,-деді Нұралы Мусиев.
Оның айтуынша, 23 ақпан күні Ақжайық пен Жаңақала ауданында екі адамның жоғалып кету фактісі тіркелген.
– Ақжайық ауданындағы жоғалған адам туралы ақпарат бізге 17.00 шамасында түсті, ол түнгі 23.00-де табылды. Ал Жаңақала ауданындағы адамның жоғалғандығын 20.00-де білдік. Ол түнгі 03.00-те аман-есен табылды. Екеуі де ешқандай зардап шеккен жоқ,-дейді Нұралы Мусиев.
БҚО денсаулық сақтау басқармасы баспасөз қызметі қала бойынша өткен тәулікте адамдарды үсік алу фактісі орын алмағанын, ал облыс бойынша ақпаратты кейін хабарлайтынын айтты.
«ҚазАвтоЖол» ҰҚ» АҚ БҚО филиалы маманының сөзінше, қазіргі таңда тек халықаралық Самара-Шымкент тас жолы ғана ашық, қалғандары әзірге жабық.
