БҚО су шайып кеткен облыстық жол жабылды
Батыс Қазақстан облысында күн күрт жылынып, Бөкейордасы ауданымен байланыстыратын көлік жолын су шайып кетті.
Бұдан бұрын жазғанымыздай, 24 наурыз күні Бөкей ордасы ауданы Бисен ауылынан 18 шақырым жерде еріген қар суы жолды басып қалған болатын.
БҚО ТЖ департаментінің баспасөз қызметі мәлім еткеніндей, облыстық маңызы бар Чапаев-Жаңақала-Сайқын жолының 192-шақырымында қар суы жолдың екінші бетіне шығып кеткен. Судың беті қайтпағандықтан, аталған жол учаскесі жабылды.
2021 жылғы 24 наурызда Бөкей ордасы ауданында (Бисен ауылынан 18 ш.) қардың тез еруі нәтижесінде 192 ш. облыстық маңызы бар «Чапаев-Жаңақала-Сайхин» тас жолында (ені 5м., тереңдігі 10-15 см.,) су жолдың екінші бетіне шығып кетті. Ағымдағы жылғы 26 наурыздағы жағдай бойынша жолдың аталған учаскесі жабық. Айналма жол Бисен кенті арқылы Т. Масин кентіне дейін, одан әрі негізгі облыстық трассаға шығады. Оқиға орнында жергілікті атқарушы органдар (2 қызметкер және 1 бірлік техника), ПД (1 қызметкер және 1 бірлік техника) кезекшілігі ұйымдастырылды.
Көліктердің жүруі және елдімекендер арасындағы тіршілік көзі бұзылмаған. Автокөліктер Бисен ауылдық округіндегі айналма жол арқылы құмның ішімен жүріп, Бөрлі ауылына немесе Жаңақала ауданына қарай шығуда. Жалпы, соңғы күндері жаңбыр жауғандықтан, жол езіліп кеткен. Оқиға орнында жергілікті атқарушы органдар мен полиция бөлімі тарапынан кезекшілік ұйымдастырылды.
Жағдай жергілікті атқарушы органдар, ПД және БҚО ТЖД бақылауында.
Сонымен қатар, Жәнібек ауданы, Күйгенкөл ауылында да іргедегі сай тасып, қызыл су шеткі үйлердің ауласына ене бастаған. Енді бірер күн жауын-шашын болса, қайтер екен?
