БҚО-да бір жұмада 700 адам коронавируспен ауырды

БҚО-да өткен аптада осыншама адам коронавирус жұқтырған.

Сырқаттанушылықтың өсу динамикасы 22-28 наурыз аралығындағы кезеңмен салыстырғанда 23,1% — ға өсті.

Бүгін, 5 сәуірде облыстың бас санитарлық дәрігері Мұхамғали Арыспаев коронавирусты таратпау жөніндегі жедел штаб отырысында осындай сандарды айтты.

— Өткен аптада коронавирустық инфекциямен ауыру 2021 жылғы 29 наурыз бен 4 сәуір аралығында 700 жағдайды құрады. Ал 22-28 наурыз аралығында COVID-19 ауруының 538 жағдайы анықталды. Бұл 23,1% — ға артық, — деді Мұхамғали Арыспаев.

— Наурызда 63 мыңнан астам ПТР-зерттеулер, ал ақпанда 52 мыңға жуық ПТР — зерттеулер жүргізілді. Айырмашылық 10 мың. Бұл аймақта коронавируспен ауыратындардың саны артып келе жатқандығының көрсеткіші. Осы айдың басынан бері 8123 ПТР-зерттеу жүргізілді, — деп баяндады Арыспаев.

Сондай-ақ, ол облыс бойынша 13 ПТР-зертхана жұмыс істейтінін атап өтті.

Серік Есенов