БҚО әкімдігі облыстың 2030 жылға дейінгі даму стратегиясын дайындауға 90 млн теңге бөлді
Мемлекеттік сатып алуды Батыс Қазақстан облысының экономика және бюджеттік жоспарлау басқармасы ұйымдастырды.
Техникалық сипаттамада хабарланғандай, экономиканың тұрақты және сапалы өсуін қалпына келтіру және проблемаларды еңсеру үшін инвестициялар тарту, мықты кәсіпкерлік тапты құру, экономиканың өзін-өзі қамтамасыз етуін арттыру және экспортты ілгерілету, индустриялық және сервистік даму, халықтың әлеуметтік әл-ауқатын және макроэкономикалық тұрақтылықты арттыру бойынша одан әрі белсенді жұмыс қажет.
«Осыған байланысты (Жалпы өңірлік өнім) ЖӨӨ өсуінің ұзақ мерзімді драйверлері ретінде Батыс Қазақстан облысының жекелеген салалары немесе кәсіпорындары емес, салалар жиынтығынан экономикалық агенттердің шоғырлануын айқындау бөлігінде облыстың 2030 жылға дейінгі даму стратегиясын әзірлеу қажет. Ол үшін Батыс Қазақстан облысының аумақтық дамуына оның жақын облыстармен кооперация мүмкіндігін және ЕАЭО және «Бір белдеу, бір жол» жобасы шеңберіндегі интеграциялық процестердің ықпалын ескере отырып, толыққанды экономикалық және әлеуметтік талдау жүргізу қажет»,-делінген құжатта.
Шенеуніктердің пікірінше, нәтижеге бағдарлану, сапалы және дұрыс түсіндірілген деректерді қамтамасыз ету, сондай-ақ жобалар мен даму бағдарламаларының барынша нәтижелілігі үшін жобалық басқаруды тарату мемлекеттік органдар жұмысының жалпы тиімділігін айтарлықтай арттыруға мүмкіндік береді. Осы мақсатта бүгінде мемлекеттік секторда жобалық кеңселер құру арқылы мемлекеттік жоспарлау жүйесінде жобалық басқару тәсілдерін енгізу қажет.
Стратегияны әзірлеудің мақсаты – Батыс Қазақстан облысының әлеуметтік-экономикалық дамуының басым бағыттарын, оларға қол жеткізудің тетіктері мен құралдарын айқындау.
Өтінімдерді қабылдау мерзімі 16 сәуірде басталады.
Дереккөзі: inbusiness.kz.
