Саз мектебінде тағы бір былықтың беті ашылды
БҚО Теректі ауданы балалар саз мектебінің басшысы Айдана Давлетова мұғалімдердің зейнетақы, медициналық сақтандыру секілді тағы да басқа міндетті төлемдерді үш жыл бойы аудармай келгенімен қоймай коммуналдық төлемді де бірнеше ай төлемеген. Мәселен, осы Теректіге қарасты Ақжайық ауылындағы №2 саз мектебінің көгілдір отынның шығыны жабылмаған. Қазіргі уақытта бұл мектептің «ҚазТрансГазАймақ»-қа берешегі 245 мың 455 теңгені құрап отыр.
Мұны күні кешеге дейін Теректі ауданы балалар саз мектебі директордың оқу ісі жөніндегі орынбасары болып жұмыс істеп келген Сандуғаш Бисенғалиева айтты.
– Директордың оқу ісі жөніндегі орынбасары лауазымын атқарып жүргенде Ақжайық ауылындағы балалар саз мектебінің коммуналдық төлемдері менің атыма келіп жүрді. Келген түбіртек қағаздарды мен «осынша төлеуіміз керек» деп директор Айдана Давлетоваға жіберіп жүрдім, өйткені қаржыға сол жауапты ғой. Бүгін енді газдың түбіртегі келіпті. Айданаға жіберейін десем ол мені бұғаттап тастаған. Сосын білім бөлімінің басшысы Жанаргүл Құсайыноваға жібердім. Біздің зейнетақы, медициналық сақтандыру тағы да басқа төлемдерді бірнеше жыл аудармай келгендерімен қоймай газдың ақшасын да төлемеген,-дейді Сандуғаш Бисенғалиева.
«ҚазТрансГазАймақ» АҚ БҚО өндірістік филиалы Теректі газ учаскесінің қызметкері Гүлфайруз Иманғалиева қарыз 22 сәуірге дейін төленбесе, шара қолданатындарын айтады.
– Қанша уақыттан бері төлемегендерін өздері жақсы біледі. Біз оларға үш күн уақыт бердік. Осы уақытта төлемесе, газды айырамыз. Қайтадан қосу үшін де ақша төлейді,-деді ол.
«Орал апталығы» тілшісі Теректі ауданы балалар саз мектебінің басшысы Айдана Давлетоваға хабарласқан, бірақ ол «Мен сіздің сұрақтарыңызға жауап бермеймін, керек болса келіңіздер, журналист екеніңізді дәлелдеңіз, телефонмен жауап беруге міндетті емеспін»,- деп тұтқаны қоя салды.
Есенжол Елекенов
