Оралда жас қыз саябақтағы аспалы көпірден секіріп кетті

БҚО ТЖ департаментінің баспасөз қызметі мәлім еткеніндей, оқиға 5 мамыр күні кешкісін қалалық мәдениет және демалыс саябағындағы аспалы көпірде болды.

Көпірден секіріп кеткен қызды жедел құтқару жасағы жеткенше, сол маңда катамаранмен жүрген екі жігіт судан алып шығып, құтқарып қалған.

БҚО ТЖ департаменті адам өмірі бәрінен қымбат екендігін, өзен-суларда сақ болу керектігін еске салады.

БҚО полиция департаменті баспасөз қызметінің мәліметінше, 20 жастағы бойжеткен өз-өзіне қол жұмсамақ болған. Аталған факті бойынша ҚР ҚК 105 — бабы «Өз-өзіне қол жұмсауға жеткізу» бойынша қылмыстық іс басталды», — деп хабарлады полициядан.

БҚО денсаулық сақтау басқармасының нақтылауынша, жедел жәрдем сағат 19.07-де шақырылды.

Алдын ала мәліметке қарағанда, миы шайқалып, іштен жабық жарақат алды деген күдікпен қыз облыстық көпбейінді аурухананың хирургиялық бөлімшесіне жеткізілді.

Қазіргі кезде оқиғаның жай-жапсары анықталу үстінде.