БҚО-да жол апаты үшін аудан әкімі жазаланды
Батыс Қазақстан облысы Ақжайық ауданының әкіміне үш адам қаза тапқан Орал-Атырау тас жолындағы апат үшін сөгіс жарияланды. Сондай-ақ, Облыстың ветеринария басқармасының басшысы Серік Нұрмағамбетовке қатысты қызметтік тергеу жүргізіледі.
БҚО әкімдігінде автожол қауіпсіздігі мәселелері қаралған кеңес өтті. Аймақ полиция департаменті бастығының орынбасары Жанболат Жаншин 16 мамырда Орал-Атырау автотрассасында болған жол-көлік оқиғасы туралы баяндады.
«Ақжайық ауданындағы Орал-Атырау тас жолының 75-ші шақырымында бүкіл отбасы-әкесі, ұлы және немересі қаза тапты. Тағы екі адам жарақат алды. ВАЗ 2113 автокөлігі түнде қараусыз қалған екі жылқыны қағып кетті», – деді полицей.
БҚО әкімі аудан әкімдеріне республикалық трассаларда автожол қауіпсіздігін қамтамасыз ету бойынша қатаң шаралар қабылдау туралы ескерткенін мәлімдеді.
«Аудан әкімі Қалияр Айтмұхамбетовке сөгіс жариялаймын. Сондай-ақ, ветеринария басқармасының жұмысы нашар екенін атап өткім келеді. 2020 жылы малдың қатысуымен болған 49 апаттың 43-інде мал иелері анықталмаған. Ветеринария басқармасының басшысына қатысты қызметтік тергеу жүргізілетін болады», – деп атап өтті Ғали Есқалиев.
Айта кетейік, осы жылдың наурыз айында Сырым ауданының әкімі Төлеген Төреғалиев сөгіс алған болатын. Оған Самара-Шымкент тас жолындағы апат себеп болды.
