БҚО-да жол апатынан полиция қызметкері көз жұмды
Қайғылы оқиға Орал — Ақсай тас жолында болды. 28 жастағы полицей көлікті басқара алмай, аударылып кеткен.
БҚО полиция департаментінің хабарлауынша, апат 9 маусым күні сағат 20-да Орал — Ақсай автожолының 25-ші шақырымында орын алған.
«Апат салдарынан облыстық патрульдік полиция батальонының 28 жастағы қызметкері алған жарақатынан ауруханада көз жұмды. ВАЗ 2110 автокөлігінің екі жолаушысы зардап шеккен жоқ», — деп атап өтті ведомстводан.
Полиция аға сержант 2017 жылдан бастап Ішкі істер органдарында қызмет еткен, оның артында әйелі мен екі баласы қалды.
Аталған факті бойынша ҚР ҚК 345-бабының 3-бөлігі бойынша сотқа дейінгі тергеу басталды, тиісті сараптамалар тағайындалды.
Еске сала кетейік, осыдан бір ай бұрын Орал-Тасқала тас жолында осыған ұқсас оқиға орын алған болатын. Сол кезде қалалық полиция басқармасының қызметкері Мержан Бисенғалиев жол апатына түсті. Жол апаты салдарынан ол алған жарақаттарынан оқиға орнында көз жұмды.
