Оралдағы КСС -19 коллекторындағы апат. Қаланың бір бөлігі сумен жабдықтаудан ажыратылған
БҚО төтенше жағдайлар департаменті баспасөз қызметінің хабарлауынша, Деркөл ауылындағы 19 А кәріз-сорғы стансасындағы апат бүгін, 16 маусым күні түнгі 02-00-де болған.
«Машина бөлімінде сорғы жабдықтары өшірілді. Себебі анықталуда. Сағат 03-00-ден бастап, Жаңа Орда, Астана, Қадыр Мырза Әли шағын аудандарында сумен жабдықтау уақытша тоқтатылды. Жөндеу-қалпына келтіру жұмыстарына «Батыс Су Арнасы» ЖШС авариялық бригадасы жұмылдырылды», — деп хабарлады БҚО ТЖД баспасөз қызметі.
Қалалық әкімдікте қазіргі уақытта апат орнында аварияны жоюға тырысып жатқан бригадалар мен арнайы техникалар жұмыс істеп жатқанын атап өтті.
«Ассенизаторлық машиналардың көмегімен КСС 17А және КСС 18А ағынды сулар сорылады. ағынды сулардың көлемін азайту және жөндеу жұмыстарын орындау мақсатында қаланың солтүстік-шығыс бөлігін сумен жабдықтау уақытша тоқтатылды. 4 нүкте бойынша су жеткізу ұйымдастырылған: 5 шағын ауданда, №5 үйдің ауласында, 7 шағын аудандағы «Назель» супермаркетінің жанында, 9 шағын аудандағы «Сатти» дүкенінің жанында және № 9 үйдің жанында», — деп хабарлады Орал әкімінің баспасөз хатшысы Данияр Оспан.
Естеріңізге сала кетейік, Оралда 2019 жылдан бастап кәріз коллекторларында апаттар орын алып, соның салдарынан қаланың кейбір бөліктері сусыз қалады.
2019 жылы сыбайлас жемқорлыққа қарсы бюро КСС-19 коллекторын салу кезінде көп миллиардтық ұрлықты анықтады, бірақ біраз уақыттан кейін ол «қылмыс құрамының болмауы»себебінен тергеуді тоқтатты.
2020 жылы пандемия кезінде Орал жөндеу жұмыстарына байланысты сусыз қалды, оған 1,5 миллиард теңге жұмсалды. Қала тұрғындарына бірнеше күн бойы су сағат бойынша берілді.
Осы жылдың басында облыс әкімі Ғали Есқалиев, қала әкімі Абат Шыныбеков және «Батыс Су Арнасы» ЖШС басшысы баспасөз жиналысын өткізді, оның барысында мемлекет инженерлік желілерді жаңғыртуға үлкен қаражат жұмсайтынын хабарлады. Сол кездегі іс-шарада әкім қалада өткен жылдардағы жағдай қайталанбайды деген уәде айтылды.
