Оралда бизнес-нысандардың есіктерін бұзып ашқаны үшін мониторингтік топ жетекшісі жазаланды
Аслан Жармұханов бастаған мониторингтік топ мүшелері букмекерлік кеңсе мен компьютерлік клубтың есігін бұзып ашқан.
БҚО Кәсіпкерлер палатасының басшысы Нұржан Мақсотов Facebook әлеуметтік желісіндегі парақшасында мониторингтік топтың жетекшісі Аслан Жармұханов «қатаң сөгіс» түрінде тәртіптік жауапкершілікке тартылғанын хабарлады.
– Орал қаласының мониторингтік тобының мүшелері Солтүстік-Шығыс шағын ауданы, 47 мекен-жайы бойынша орналасқан «Астана» сауда үйіне жапсарлас құрылыстағы Level компьютерлік клубының сыртқы қақпасының кіру есігін бұзып ашқан. Бұдан басқа, «Лото»букмекерлік кеңсесі үй-жайының есіктері де бұзып ашылды. Мониторингтік топтың жоғарыда көрсетілген әрекеттері кәсіпкерлер палатасы алаңында талқылау тақырыбы болды, оның нәтижелері бойынша облыс прокуратурасы мониторингтік топтар қызметінің заңдылығына талдау жүргізді, – деп хабарлады Нұржан Мақсотов.
Прокурорлар мониторингтік топ мүшелерінің әрекеттерінен қолданыстағы заңнаманы бұзушылықтарды тапты.
– Жоғарыда баяндалғанның негізінде облыс прокуратурасы БҚО әкімдігіне заң бұзушылықтарды жою туралы ұсыныс енгізді, оны қарау нәтижелері бойынша мониторингтік топтың басшысы Аслан Жармұханов «қатаң сөгіс» түрінде тәртіптік жауапкершілікке тартылды, – деп хабарлады Нұржан Мақсотов.
