Қазақстанға уақытша әкелінген көліктердің иелері оларды 30 қыркүйекке дейін алып кетуі керек-салық қызметкерлері
Қазақстанға уақытша әкелінген автокөліктердің иелері оларды 30 қыркүйекке дейін алып кетуі керек, деп хабарлайды Мемлекеттік кірістер департаментінің (МКД) баспасөз қызметі.
«Еуразиялық экономикалық комиссия кеңесі 2021 жылғы 5 сәуірдегі № 25 шешімімен жеке тұлғалар жеке мұқтаждықтары үшін шет мемлекеттерден уақытша әкелген автомобильдер мен басқа да көлік құралдарының Еуразиялық экономикалық одақтың кедендік аумағында болу мерзімін 2021 жылғы 30 қыркүйекке дейін ұзартты.
Аталған шешіммен сондай-ақ Одаққа тұрақты тұруға қоныс аударған адам, босқын, мәжбүрлі қоныс аударушы мәртебесін алған шетел азаматтарының жеке мүлкін одақтың кедендік аумағына жеңілдікпен бажсыз әкелуі мүмкін 18 ай мерзім тоқтатыла тұрады», — делінген бейсенбі күнгі хабарламада.
Сондай-ақ, Мемлекеттік кірістер департаменті 30 қыркүйекке дейін көлік құралдарын алып кетпеген жағдайда кедендік баждар мен салықтар толық көлемде төленуі тиіс екенін нақтылады.
