БҚО-да ковидтік стационарлар науқастарға толған

Батыс Қазақстан облысында инфекциялық стационарлар ауыр жүктемемен жұмыс жасауда. Бұл туралы облыстың бас мемлекеттік санитарлық дәрігері Мұхамғали Арыспаев мәлімдеді. 26 шілдеден бастап БҚО-да карантиндік шараларды күшейту туралы жаңа қаулы күшіне енді.

Мұхамғали Арыспаев атап өткендей, қазір стационарлық жағдайда емді өңірдің 783 тұрғыны алады, оның 55-і реанимация бөлімшелеріне орналастырылды.

«Инфекциялық стационарларға үлкен жүктеме түсіп жатыр. Облыстық көпбейінді аурухана жанындағы стационарда орын жоқ. БҚО Бөрлі ауданында стационар 75 орынға есептелген, қазір онда 73 науқас жатыр. Біз карантинді күшейтуге мәжбүрміз. Аурудың күрт өсуі байқалады. Тек шілде айында КВИ аймақтың 5 мыңнан астам тұрғыны ауырып қалды. Өткен жылы 3 мың адам болды», – деді ол.

Жалпы Орал қаласында 911 төсек-орынға арналған 7 стационар жұмыс істейді, олардың жүктемесі 67,3% – ды құрайды (911-дің 613-і).

26 шілдеден бастап БҚО – да бас мемлекеттік санитарлық дәрігердің жаңа қаулысы күшіне енді.

«Коронавирустың неғұрлым жұқпалы «дельта» штаммы таралуда. Демалыс күндері қоғамдық көліктің жұмысы тоқтатылады, сондай-ақ сауда орталықтары, базарлар, қоғамдық тамақтану объектілері, фитнес-орталықтар, балалар ойын-сауық орталықтары, сауналар, моншалар, бассейндер жабылады. ХҚКО, «Қазпошта» бөлімшелері және діни нысандар жұмыс істемейді», – деді Мұхамғали Арыспаев.

БҚО аумағында барлығы 20 инфекциялық стационар жұмыс істеуде.