БҚО ауыл әкімін мас күйінде көлік жүргізгені үшін жұмыстан шығармақ
Батыс Қазақстан облысының Әдеп жөніндегі кеңесі Бәйтерек ауданы Янайкино ауылының әкімін қызметінен босатуды ұсынды. Ауған Альмурзин мас күйінде көлік жүргізгені үшін әкімшілік жауапкершілікке тартылды, деп хабарлайды Tengrinews.kz. тілшісі.
Мемлекеттік қызметшінің ісі Әдеп жөніндегі кеңесте онлайн-форматта қаралды. Бұл карантиндік шектеулерге байланысты.
«2021 жылдың 11 мамырында Орал – Атырау тас жолында автокөлік тоқтатылды, оның рульінде Янайкино ауылының әкімі Ауған Альмурзин болды. Медициналық куәландыру мемлекеттік қызметкердің мас күйінде көлік жүргізгенін анықтады», – деп хабарлады БҚО мемлекеттік қызмет істері агенттігінің департаментінен.
Аудандық соттың шешімімен Ауған Альмурзин ҚР ӘҚБтК-нің 608-бабында көзделген әкімшілік құқық бұзушылық жасағаны үшін кінәлі деп танылды (Мас күйдегі жүргізушінің көлік құралын басқаруы). Құқық бұзушы 15 тәулікке қамауға алынып, жеті жылға көлік жүргізу құқығынан айырылды.
Альмурзиннің өзі мас болғанын жоққа шығармады. Алайда ол бір кружка сыра ішкенін атап өтті.
«Бұл мемлекеттік қызметшінің өрескел әрекеті. Орал-Атырау тас жолында көптеген апаттар орын алуда. Олардың көпшілігі адамдардың өлімімен аяқталады. Ауыл әкімінің теріс қылықтан кейін жұмыс істеуге құқығы жоқ деп санаймыз», – деді БҚО Әдеп жөніндегі кеңесінің төрағасы Ғалым Тұрсынбаев.
Әдеп жөніндегі кеңес мемлекеттік қызметшіні ауыл әкімі қызметінен босату туралы ұсыныс жасады.
