БҚО жолында полиция көлігінің макеті ұрланған
Батыс Қазақстан облысының полицейлері Чапаев-Жалпақтал-Казталовка тас жолында орнатылған патрульдік автомашина макетінің жоғалғанын анықтады.
Полиция макетті жергілікті тұрғындардың бірі ұрлап кеткенін анықтады.
«Автожолдан макеттің жоғалуы 23 қыркүйекке қараған түні анықталды. Жедел-іздестіру іс-шаралары барысында макет табылды. Оны ұрлаған күдікті ұсталды. Бұл қырық жастағы адам. Бұрын ол сотталмаған. Тергеу ұрлаудың себебін анықтап жатыр»,-деп атап өтті БҚО полиция департаментінің баспасөз қызметі.
Қазір аталған факті бойынша ҚР ҚК 188-бабының 1-бөлігі «Ұрлық» бойынша сотқа дейінгі тергеу басталды. Ер адам үш жылға дейін бас бостандығынан айырылуы мүмкін.
Айта кетейік, полиция көліктерінің макеттері 2019 жылы Қазақстан жолдарында жол қозғалысы қауіпсіздігі және көлік құралдары жүргізушілерінің жылдамдық режимін сақтауы үшін орнатылды.
