БҚО-да Ақсай-Бөрлі автожолында сиырдың макеті ұрланды
Батыс Қазақстан облысының кейбір тұрғындары макеттерді жақсы көргендіктен, бұл соңғы аптадағы екінші ұрлық.
Полицияның мәліметінше, жол-көлік оқиғасының алдын алу және жүргізушілердің назарын аудару мақсатында Ақсай-Бөрлі автожолында жануардың (сиырдың) макеті орнатылған. Алайда, «сиыр» тек бірнеше сағат қана тұрды.
– Макетті қаскүнемдер түнге жетізбей ұрлап кетті. Оны қандай мақсатпен алғаны белгісіз. Қазіргі уақытта Бөрлі ауданының полиция бөліміне аталған іс бойынша шара қабылдау және жауапкершілікке тарту туралы хат жолданды, – деп хабарлады полиция департаментінің баспасөз қызметі.
Айта кету керек, бұл макетті ұрлаудың екінші жағдайы. 23 қыркүйекте Чапаев-Жалпақтал-Казталовка автожолында полиция көлігінің макетін алып кетті. Полиция күдіктіні екі сағаттан кейін ұстады. Ол 40 жастағы ер адам болып шықты. Неліктен оған полиция көлігінің макеті қажет болды, тергеу анықтауда.
