БҚО-да сауда желілеріне айыппұл салынады
Бөлшек сауда желілері әлеуметтік өнімдерді делдалсыз сатып алуы керек. БҚО әкімі Ғали Есқалиев бағаны ұстап тұру тетіктерін талқылаған жиында осындай тапсырма берді.
Егер өндіруші облысқа қарақұмық жармасын килограмы үшін 423 теңгеден жеткізсе, онда үш делдалдың орамы арқылы ол дүкендерге 635 теңге бағасымен жетті. Мұндай фактілер аз емес.
Өңірдің ірі сауда желілерін тексеру барысында бұзушылықтар анықталды. Заң бойынша кәсіпкерлер әлеуметтік маңызы бар тауарлар бағасының 15 пайызынан аспайтын мөлшерде үстемеақы төлеуге тиіс. Сәбізге үстеме баға 36, жұмыртқаға – 34, пиязға – 32 пайызды құрады. Бес сауда объектісі ескерту алды, бұзушылықтар қайталанған жағдайда оларға үлкен айыппұл салынады.
– Белгілі бір өнім түрлеріне үстемеақы 15 пайыздан аспауы тиіс деген норма бар, – деп атап өтті Ғали Есқалиев.
Сауда желілерінде бағаны ұстап тұру үшін «қарбалас сағат ұйымдастырылды. Таңертең әлеуметтік өнімдер тауар өндірушінің бағасымен сатылады.
– Тұрақтандыру қорына тауарлар сатып алу үшін 130 млн теңге бөлінді. Қосымша 1,2 млрд теңге бөлінеді деп күтілуде. «100 сауда орны» жобасы аясында 43 жер телімі бөлінді, – деді БҚО кәсіпкерлік және индустриалды-инновациялық даму басқармасы басшысының орынбасары Жанна Бекқалиева.
Ауыл шаруашылығы басқармасы бізге өнімдердің кейбір түрлерін облыстан тыс жерлерден толығымен әкелуге тура келетінін хабарлады. Олардың ішінде қарақұмық, күріш және сүт бар.
– Облыс тұрғындарын сүт, тауық еті және көкөніспен толық қамтамасыз ету үшін 164 млн теңгенің 94 инвестициялық жобасы іске асырыла бастады, – деді БҚО ауыл шаруашылығы басқармасы басшысының орынбасары Денис Умашев.
Айта кетейік, облыстағы көкөніс қоймаларының қуаттылығы 42 мың тоннаны құрайды. Бұл жеткіліксіз. Сонымен қатар, олардың көпшілігі Кеңес заманында салынған.
– Биыл 7,5 мың тонна көкөніс қоймасын, болашақта қосымша тағы 20 мың тонна көкөніс қоймасын іске қосуды жоспарлап отырмыз, – деп атап өтті БҚО әкімі.
Қазір әкімдік ірі өндірушілермен тауарларды төмендетілген бағамен сату бойынша келісім-шарт жасау жұмыстарын жүргізуде.
