Оралда мемлекет тәркіленген темекіні сақтауға 60 млн теңге жұмсалған
Тәркіленген заттар қоймаларда және мұздатқыштарда бірнеше жылдан бері сақталуда.
БҚО қаржы басқармасы басшысының міндетін атқарушы Нұрлан Есенғалиевтің айтуынша, тәркіленген заттарды сақтау жергілікті бюджет есебінен жүзеге асырылады. Мысалы, жергілікті атқарушы органдардың сақтауында 2,7 тонна балық бар, оған жергілікті бюджет қаражатынан 50 миллион теңгеден астам қаражат жұмсалды.
– Оларды сату үшін, ал түскен қаражатты мемлекет кірісіне айналдыру үшін соттың тиісті шешімі қажет. Бірақ соттың жою туралы жарияланған шешімі орындалмайтын жағдайлар бар. Мысалы, Орал әкімдігінде 6,7 миллион бірлік темекі өнімдері бар, оларды сақтауға үш жыл ішінде 58 миллион теңгеден астам қаражат жұмсалды, – деп атап өтті Нұрлан Есенғалиев.
Өңір басшысы Ғали Есқалиев екі жыл ішінде осындай заттарды сақтауға 100 миллион теңге жұмсалғанын атап өтті.
– Меніңше, бұл үлкен мәселе емес, бірақ ресурстарды жұмсау тұрғысынан маңызды рөл атқарады. Браконьерлерді ұстауға, мүлкін тәркілеуге, қоймаларға жеткізуге, сақтауға көптеген адамдар жұмылдырылып, бюджет қаражаты жұмсалады. Бізде бірнеше жылдар бойы қоймаларда сақталған тәркіленген заттар бар. Республикалық бюджетке пайда әкелудің орнына, керісінше, шығындар артады. Бұл дұрыс емес, сақтауда темекі өнімдері, балық, ақбөкен мүйіздері бар. Бір ай мерзім ішінде тәртіп орнауы керек, не жойып, не сатуыңыз керек, ал ақшаны мемлекет кірісіне аударыңыз. Үш жыл ішінде тәркіленген 3 272 киік мүйізінің тек 918-і ғана жойылды. Кеңес заманында олар тиісті органдар арқылы рәсімделіп, сатылды. Орман шаруашылығы және жануарлар дүниесі жөніндегі аумақтық инспекция министрлікпен бірлесіп осы мәселені пысықтауға тиіс, өйткені киіктің үш мыңнан астам мүйізі қомақты ақшаға бағаланатын болады. Өйткені, біз оларды сатпаймыз және жоймаймыз. Сонда бәрі қайда кетеді? Заңсыз айналымға ма? Прокуратура органдары бұған да назар аударуы керек, – деді Ғали Есқалиев.
