Жайық өзенінің ластанғанын анықтау үшін кешенді тексеру жасалды
Экология, геология және табиғи ресурстар министрлігі Жайық өзенінің экожүйесін сақтау үшін қандай шаралар атқарылып жатқанын айтып берді.
Жайық трансшекаралық өзені бассейнінің экожүйесін сақтау және қалпына келтіру жөніндегі Қазақстан-Ресей ынтымақтастығының 2021-2024 жылдарға арналған бағдарламасын іске асыру шеңберінде 26-30 сәуір аралығында ҚР Экология министрлігі мен жергілікті атқарушы органдар өкілдерінің қатысуымен өзен бассейніне ластанудың барлық көздерін және оның экожүйесіне теріс әсер етудің басқа да факторларын анықтау тұрғысынан кешенді зерттеу жүргізілген.
Жүргізілген зерттеу барысында трансшекаралық аумақтардан, сарқынды су төгінділері байқалатын жерлерден сынама алынды.
Су объектілерінің, оның жағалау аймағының жай-күйіне көзбен шолу және гидрологиялық тексеру жүргізілді.
Ластанудың болжамды көзі орындарында ауаның ластану деңгейін 6 көрсеткіш (күкіртті сутек, формальдегид, аммиак, күкірт диоксиді, азот оксиді, азот диоксиді) бойынша өлшеу және су сапасына гидрохимиялық талдау 33-38 көрсеткіш бойынша жүргізілді.
Кешенді тексеру қорытындысы бойынша Батыс Қазақстан және Ақтөбе облыстарының аумағында су сапасының 4 және 5-класы, Атырау облысында – 1-4-класы анықталды.
Батыс Қазақстан облысы аумағында Жайық өзенінің су сынамасында ОБТ5 (5 тәулік ішінде оттегін биохимиялық тұтыну), фосфаттар мен жалпы фосфор, аммоний-ион, жалпы темір, магний және хлоридтер бойынша Бірыңғай жіктеу жүйесіне сәйкес су сапасының 1-класы (ең жақсы сапа) нормаларының асып кетуі байқалады.
Жоғарыда аталған ластаушы заттарды шамадан тыс мөлшерде табу қардың еруінен, жағалаулардың шайылуынан және су тасқыны кезінде су деңгейінің жоғарылауы нәтижесінде судың ластануынан туындауы мүмкін.
Сондай-ақ, атмосфералық ауа сынамасы алынды. Мониторинг нәтижесі бойынша шекті жол берілетін концентрация артқан жоқ.
Облыс аумағында қалдық төгетін кәсіпорындар – «Жайықжылуқуат» АҚ, «Батыс су Арнасы» ЖШС.
Алайда кешенді зерттеу жүргізу кезінде бұл кәсіпорындардың су сапасына әсері анықталған жоқ.
