БҚО-да мұнай шламын тек лицензиясы бар компаниялар ғана кәдеге жарататын болады

Енді мұнай – газ өндіру қалдықтарын кәдеге жаратумен айналысатын КПО б.в. және «Жайық Мұнай» мердігерлік ұйымдарының ешқайсысы орман мен далаға шламды тастамайды, – деп уәде берді ҚР Экология министрлігі Экологиялық реттеу және бақылау комитетінің төрағасы Зулфухар Жолдасов.

Бұл мәлімдемені Зулфухар Жолдасов Uralsk Green Forum халықаралық экологиялық форумында қалдықтарды басқару мәселесіне арналған сөйлеген сөзінде жасады.

Атап айтқанда, ол «жасыл» экономикаға көшу жөніндегі тұжырымдаманы іске асыру барысында 2021 жылғы 2 қаңтарда Қазақстан Президенті 2021 жылғы екінші жартыжылдықтан бастап күшіне енген Экологиялық кодекске қол қойғанын атап өтті.

Қауіпті қалдықтарды кәдеге жарату мен қайта өңдеуді лицензияланатын қызмет түріне ауыстыру қалдықтарды басқару тұрғысынан ҚР Экологиялық кодексінің маңызды жаңалықтары болып табылады.

-Бұрын, тура 4-5 жыл бұрын, КПО б.в. компаниясы өзінің өндірістік қалдықтарын өңдеу мүмкіндігі де, мұнай шламын кәдеге жаратуға арналған құжаттары да, оны орналастыру орындары да жоқ жосықсыз мердігер компанияларға берген жағдайлар туындаған болатын. Олар бұл қалдықтарды далаға шығарды. Осыған байланысты бірнеше қылмыстық іс қозғалды. Енді жер қойнауын пайдаланушылардың қалдықтарын кәдеге жаратумен және қайта өңдеумен қызметтің осы түріне лицензиясы бар кәсіпорындар ғана айналысатын болады, – деп хабарлады ҚР Экология министрлігі Экологиялық реттеу және бақылау комитетінің басшысы. – Мемлекет жергілікті билік атынан қандай қалдықтарды шығаратынын, оларды қалай кәдеге жарататынын нақты қадағалайтын болады.

Сонымен қатар, экологиялық заңнамадағы өзгерістерге сәйкес, қалдықтарды жою бойынша барлық компаниялар енді арнайы тізілімде болуы керек және GPS навигаторларымен толық жабдықталған болуы керек. Осылайша, жұртшылық пен мемлекеттік органдар жер қойнауын пайдаланушылардың мердігерлері мұнай шламдары мен өзге де қауіпті қалдықтарды қайда орналастыратынын білетін болады – осы мақсаттар үшін оларда мамандандырылған полигондар көзделуі тиіс.

Қалдықтарды басқару саласындағы субъектілердің тізілімінде тіркеусіз қоқысты кәдеге жарату қызметіне тыйым салынатынын атап өткен жөн.

Анықтамалық

КПО б.в. халықаралық IV экологиялық форумын Батыс Қазақстан облысының әкімдігімен бірлесіп, 2017 жылдан бастап жыл сайынғы негізде өткізеді.

Экологиялық форум БҰҰ-ның Орнықты даму мақсаттарына сәйкес өңірдің орнықты дамуы үшін тиімді коммуникациялық және іскерлік алаңды қолдауды өзінің мақсаты етіп қояды:

* қалдықтарды басқару саласындағы экологиялық заңнаманың жаңа қағидаттарын түсіндіру;

* қалдықтарды басқару тәжірибесімен және озық практикалармен, қалдықтарды өңдеудің ең озық қолжетімді технологияларымен алмасу;

* Батыс Қазақстан облысының қалдықтарды қайта өңдеу деңгейін арттыру және өңірде «жасыл» бизнесті дамыту;

* қалдықтардың пайда болуын азайту және бөлек жинау практикасын сақтау саласында халықтың экологиялық хабардарлығын арттыру.

Людмила КАЛАШНИКОВА