Қазақстанда мыңға жуық сотталған рақымшылық бойынша бостандыққа шығады
Сенат депутаттары «Қазақстан Республикасы Тәуелсіздігінің 30 жылдығына байланысты рақымшылық жасау туралы» заң жобасын мақұлдады.
Бас бостандығынан айыру орындарынан ауырлығы орташа және онша ауыр емес қылмыстар жасаған сотталғандар шығады. Бұдан басқа, кейбір ауыр және аса ауыр қылмыстар үшін жазаның өтелмеген мерзімін қысқарту көзделген.
Алдын ала есептеулер бойынша, рақымшылыққа 14 мыңнан астам адам түседі, түзеу мекемелерінен 1 мыңға жуық адам шығады, 3,8 мың адам пробация есебінен шығарылады.
Рақымшылық азаматтар мен мемлекеттің қауіпсіздігіне елеулі қатер төндірмейтін ардагерлерге, кәмелетке толмағандарға, егде жастағы азаматтарға, I-II топтағы мүгедектерге және басқа да тұлғаларға қатысты қолданылатын болады.
«Қабылданған заң аса қауіпті қылмыс жасаған адамдарға рақымшылық жасауға тыйым салады, бұл криминогендік жағдайдың нашарлау қаупін болдырмайды. Бұл заңның қабылдануы азаматтарға өз қателіктерін қайталамауға және жаңа өмір бастауға мүмкіндік береді», – деп қорытындылады Парламенттің жоғарғы палатасының спикері Мәулен Әшімбаев.(ОРДА)
