БҚО әкімінің орынбасары Аманжол Алпысбаев қызметінен босатылды
Батыс Қазақстан облысының әкімі Ғали Есқалиевтің өкімімен оның орынбасары Аманжол Алпысбаев қызметінен босатылды. Аймақ басшысының баспасөз қызметі мемлекеттік қызметшіге жұмысы үшін алғыс айтып, кәсіби табыс тіледі.
«Мемлекеттік қызметке сәйкес келмейтін жұмыс жағдайларына байланысты Батыс қазақстан облысы әкімінің орынбасары Алпысбаев Аманжол Әлиханұлы «Мемлекеттік қызмет туралы» ҚР Заңының 59-бабының 4 және 5 – тармақтары негізінде әкімнің өкімімен қызметінен босатылды»,-деп хабарлады БҚО әкімінің баспасөз қызметі.
Ведомствода Аманжол Алпысбаев 2019 жылдың шілде айынан бастап қызмет атқарғанын атап өтті. Осы уақыт ішінде ол өзін кәсіби маман ретінде көрсетті.
«Аманжол Алпысбаев сәулет, қала құрылысы және құрылыс, ТКШ саласындағы стратегиялық жоспарлау мәселелеріне, сондай-ақ тарифтік саясат, МЖӘ дамыту, мемлекеттік сатып алу, табиғат пайдалану, жануарлар мен өсімдіктер дүниесін қорғау мәселелеріне жетекшілік етті. Ол ел Президентінің шығыстарды оңтайландыруға, сыбайлас жемқорлық тәуекелдерін анықтауға және т. б. қатысты тапсырмаларын орындау бойынша өңір үшін үлкен жұмыс жүргізді. Алпысбаев Мемлекеттік сатып алудың үш жылдық жоспарын әзірлеу кезінде тікелей талдаумен және бюджет қаражатын үнемдеу мен барынша тиімді жұмсаудың өзге де мәселелерімен айналысты», – деп хабарлады БҚО әкімдігі.
Еске сала кетейік, ҚР Мемлекеттік қызмет істері агенттігінің өңірлік департаменті Аманжол Алпысбаевты қызметінен босатуды ұсынған болатын. Ведомствода шенеунік «Самұрық Гидро»ЖШС басшысы бола отырып, заңды бұзғанын хабарлады. Бірақ әкімнің орынбасары мұндай серіктестіктің бар екенін білмейтініне сендіре отырып, бұл дәлелдермен келіспеді. Ол ұсыныстарды заңсыз деп тануды талап етіп, әкімшілік сотқа төрт рет шағым түсірді.
