БҚО үшін өңір экономикасын дамыту бағдарламасына республика бюджетінен қаржыландыру ұлғайтылады
Қаңтар айының басында Батыс өңірлерде басталған жаппай наразылық акцияларынан кейін Тоқаев өңірлік дамудағы теңгерімсіздік туралы мәлімдеді. «Диспропорция әлеуметтік жайсыздыққа, көші-қон көңіл-күйінің өсуіне алғышарттар жасайды. Үкіметке осы өңірлер үшін «Ауыл – Ел бесігі», «Бизнестің жол картасы» және басқа да бағдарламалар шеңберінде жекелеген бағыттар әзірлеуді тапсырамын» — деді Мемлекет басшысы Үкімет алдында сөйлеген сөзінде.
Бүгін БҚО әкімі Ғали Есқалиев Үкімет отырысында өңірдің проблемалық мәселелерін шешуге бағытталған облысты дамытудың жаңа кешенді жоспарын таныстырды. Онда 116 іс-шара бар, қаржыландыру көлемі 2.6 трлн. теңге. Олардың басым бөлігі (2.2 трлн. теңге) 29 ірі инвестициялық жобаны іске асыру арқылы экономиканы дамытуға есептелген.
Батыс Қазақстан облысын дамытудың жаңа кешенді жоспары мыналарды қамтиды:
өнеркәсіп және кәсіпкерлік саласында индустриялық аймақ құру, құю өндірісін, мұнайды терең өңдеу зауытын және цемент зауытын салу жоспарланған;
ауыл шаруашылығы саласында 2 жылыжай, 25 бордақылау алаңы, 10 сүт-тауар фермасын салу, 4 шарбақты балық өсіру шаруашылығын құру, суармалы жерлер алаңын 6,6 мыңнан 50 мың гектарға дейін қалпына келтіру және кеңейту және Киров су қоймасын реконструкциялау көзделген;
коммуналдық шаруашылықта сумен жабдықтау және су бұру желілерінің 1211 километрін, жылумен жабдықтау желілерінің 46,2 километрін және электр желілерінің 2051 километрін салу және реконструкциялау, «Ростоши — Тайпақ» газ құбырының 29,7 километрін реконструкциялау, сондай-ақ Орал қаласында автоматтандырылған газ тарату станциясының құрылысы жоспарлануда;
1842 шақырым автожолға жөндеу және қайта жаңарту, Орал қаласының халықаралық әуежайын жаңғырту жүргізіледі;
емхана, кардиологиялық орталық, 74 мектеп, студенттерге арналған 650 орындық жатақхана және 150 төсек-орындық оңалту орталығы салынады. Азаматтық қорғауды қамтамасыз ету үшін 3 өрт сөндіру депосының құрылысы, Жайық өзенінде жағалауды нығайту жұмыстары қарастырылған;
Батыс Қазақстан облысының кешенді жоспарын іске асыру нәтижесінде 2025 жылға қарай өнеркәсіп көлемі 55 пайызға және ауыл шаруашылығының жалпы өнімі 56 пайызға өсуі тиіс, сумен жабдықтау қызметтеріне қол жеткізу деңгейі 100 пайызға жетеді, ал электр желілерінің тозуы 80 пайыздан 50 пайызға дейін қысқарады.
ӘРІ ҚАРАЙ ТАҚЫРЫП БОЙЫНША: БҚО билігі бір ғана әлеуетті инвестормен 14 млрд теңгенің индустриалды аймағын салмақшы
